Archive for the
‘Danbaka 6’ Category

Home / Danbaka 6

2025-01-16

danbaka

Danbaka 6

Danbaka musika lehiaketako finala gertu

Danbaka musika lehiaketako finala gertu 0

Del Val, Rebel Noise eta Malko taldeak igoko dira Bergarako Seminarixoko oholtzara urtarrilaren 17an.

Debagoieneko hamasei talde igo dira guztira Seminarixoko oholtzara, eta epaimahaiak aukeratuta, Arrasateko Del Val eta Rebel Noise taldeek eta Oñatiko Malko taldeak jokatuko dute finala urtarrilaren 17an, 21:30ean hasita. 40 minutuz arituko dira hiru taldeak oholtza gainean, eta ostean, saridunen berri emango du epaimahaiak. Lehiaketako sari nagusiaren irabazleak disko bat grabatzeko aukera izango du; publikoaren boto gehien jasotzen dituenak bideoklip bat grabatu ahalko du; eta, azkenik, Danbaka-Ekinez Saria irabazten duenak 2025eko maiatzaren 30ean eta 31n Bergarako Labegaraieta auzoan egingo den Ekinez jaialdian jotzeko aukera izango du.

Kontzertuetarako sarrerak 5 eurotan salduko dira, Seminarixoan bertan, kontzertu egunean; Goienakideak doan sartu ahalko dira, Goienaren aplikazioa erakutsita; eta Goienakide ez izan arren Goiena aplikazioa deskargatuta dutenek 2 euro ordainduko dute sarrera. Goienakide ez direnak ere doan sartu ahalko dira, Goiena eta Primeran aplikazioak deskargatuta.

Primeran-en ikusgai

Danbakako finala Bergaran ikusi ezin dutenek Primeran streaming plataforman ikusi ahal izango dituzte kontzertuak, zuzeneko emisioan.

2024-07-17

danbaka

Danbaka 6

Badator Danbaka Musika Lehiaketaren seigarren aldia

Badator Danbaka Musika Lehiaketaren seigarren aldia 0

Danbaka urtea izango da 2024a ere, bueltan dator-eta Debagoieneko Musika Lehiaketa. Seigarren aldia izango da aurtengoa, eta Bergarako Seminarixoa aretoan egingo da. Lau kontzertu izango dira, urritik abendura, eta final handia, urtarrilean. Debagoieneko musika taldeek hartu ahal izango dute parte. Izena emateko aukera zabalik dago. Goiena Komunikazio Taldeak antolatuko du aurten ere, Bergarako Udalaren laguntzarekin.

2024-07-17, Bergara

Gaur aurkeztu da Danbaka Debagoieneko Musika Lehiaketa, Bergarako Seminarixoa aretoan. 2022ko edizioak utzi zuen zapore eta oroitzapen gozoaren ostean, aurten ere antolatzea erabaki dute. Debagoieneko taldeei dago zuzenduta eta, edizio guztietan bezala, denetariko estilo eta formatuak izango dira ondoetorriak. Gainera, ez zaie aterik itxiko 2022an parte hartu zutenei.

Lau gau, eta urtarrilean final handia

Debagoieneko hamasei taldek hartu ahalko dute parte lehiaketan. Hamabost talde Danbakako epaimahaiak aukeratuko ditu; azkena, publikoak, boto bidez. Zuzeneko emanaldiak izango dira epaimahaiak baloratu beharrekoak. Hala, seigarren edizio honetan lau kontzertu izango dira, urriaren 25etik abenduaren 13ra. Final handia urtarrilaren 17an jokatuko da. Aurten ere, beraz, kontzertu guztiak ostiraletan, 21:30ean hasita, Bergarako Seminarixoan. Edozein eratako musika estiloak onartuko dira.

Izen-ematea zabalik dago irailaren 22ra arte

Izen ematea zabalik dago. Irailaren 22ra arte eman ahalko dute izena Debagoieneko musikariek. Edozein estilotako bakarlariak eta taldeak onartuko dira. Baldintzetako bat izango da parte-hartzaileetako bat –gutxienez– Debagoienean erroldatuta egotea.

Aurten ere hiru sari egongo dira

Aurten ere hiru sari emango ditu Danbakak. Disko bat grabatzea, bideoklip bat grabatzea eta Ekinez jaialdian jotzeko aukera. Sari Nagusia izango da diskoa grabatzea; Publikoaren Saria, bideoklip bat; eta Danbaka-Ekinez saria, azkenik, 2025ean Bergaran egingo den Ekinez jaialdian jotzeko aukera.

Oinarriak eta gainerako zalantzak

Danbakaren gaineko informazio guztia, danbaka.eus-en.

Gorka Artola, Bergarako alkatea:

“Danbaka erakusleiho bikaina da Debagoieneko taldeentzat”

“Plazer handia da hainbeste denboraz geldirik egon izan den ekimen honi berriz ere jarraikortasuna ematea. Izan ere, 12 urtetan ospatu barik egon ostean, duela pare bat urte Bergarako Udaletik talde hasiberrien aldeko apustua egitea erabaki genuen.

Ziurrenik, hamabi urtetan asko aldatu da panorama musika munduan, baina argi dagoena da talde gazteek bultzadatxoa behar izaten dutela, eta, kasu honetan, gu ere prest gaude bultzada hori emateko.

Bergaran kultura musikala oso bizirik mantendu da hamarkadetan, eta hori, hein handi batean, gure herrian daukagun ibilbide kulturalarengatik izan da. Bergara herri bizia da, sekulako egitarau kultural oparoarekin, eta horrek harro sentiarazten gaitu.

Aurtengoa seigarren edizioa izango da, eta gure helburua, behintzat, bada egitasmoa honi jarraikortasuna ematea, eskualdeko eta, bereziki, Bergarako musika taldeentzat erakusleiho bihurtzeko. Ez dakigu Danbaka honetatik hurrengo Gorka Urbizu edo Izaro berria irtengo den, baina argi daukaguna da erakundeetatik aukerarik eskaini ezean hori lortzea zailagoa izango dela”.

Monika Belastegi, Goienako Komunikazio Taldeko presidentea:

“Danbaka, elkarlanean, komunitatearekin batera, antolatzen dugu”

“Pozik eta ilusioz beteta aurkezten dugu Danbakaren seigarren edizioa. Goienaren berezko helburuekin bat egiten du Danbaka Musika Lehiaketak. Alde batetik, Danbakarekin, gazteak erakarri nahi ditugu euskal hedabideetara; hain justu, Goienako hedabideetara. Eta bestetik, eskualdeko musikariei –bakarlari, bikote zein talde– aukera eskaini nahi diegu era askotako musika adierazpenak haizatuz.

Eta hori guztia, elkarlanean, komunitatearekin batera, hainbat kolaboratzailerekin. Hain zuzen, Bergarako Udalarekin eskutik goaz proiektu honetan; duela bi urte bezala, bosgarren edizioan; eta, nola ez, eskerrak eman nahi dizkiot Bergarako Udalari, egitasmoan sinistearren eta seigarren honetan berriz bidelagun izatearren.

Edizio oso arrakastatsua izan zen Seminarixoan egin genuen bosgarren hura, eta ziur gaude oraingo hau ere arrakastatsua izango dela”.

Jokin Bereziartua, Danbakako koordinatzailea:

“Denetariko estilo eta formatuak izango dira ongietorriak; jakin badakigu azken bi urteetan hainbat proiektu berri sortu direla gurean”

“Gezurra badirudi ere, pasatu dira bi urte azken Danbaka egin genuenetik. Esperientzia ederra izan zen, eta errepikatzera gatoz. Danbakaren 2004ko lehen ediziotik mantentzen dugu bailarako taldeentzat erakusleiho izateko bokazioa, eta sinistuta gaude egiteko horretan ekarpen handia egin dezakegula.

Honako hauek izango dira lau jaialdietarako datak: urriaren 25a, azaroaren 15a, azaroaren 29a eta abenduaren 13a. Eta gero, urtarrilaren 17an jokatuko da final handia. Gau bakoitzeko lau proposamen izango ditugu Seminarixoan, bederatzi eta erdietan hasita.

Eta ondo funtzionatzen duena bere horretan mantendu behar delako, Sanprubusa izango dugu San Martin plazan eta chill out gunea ere egongo da aurten. Areto barruan ere barra zerbitzua egongo da.

Eta esandakoa, denetariko estilo eta formatuak izango dira ongietorriak; jakin badakigu azken bi urteetan bakarrik hainbat proiektu berri sortu direla gurean.

Oinarriak eta gainerako xehetasun guztiak danbaka.eus atarian izango dituzue ikusgai.

Ez nuke gaurko prentsaurrekoa amaitu nahi iazko uztailean hil zen Xabier Labaien aipatu gabe. Danbakako edizio guztietan, 2004tik 2010era arteko lau edizioetan eta 2022koan soinu teknikari lanetan aritu zen. Beti itzalean, isil-isilik eta ezkutuan lanean, sekulako lana egiten zuen. Besarkada estu bat, Xabier, zauden lekuan zaudela.

Jokin Larrañaga, The Clayton taldeko abeslaria:

“Esperientzia aberasgarria bezain ezberdina izan zen guretzat; ez genuen lehiaketa moduan bizi izan, beste plaza bat ezagutzeko aukera moduan baizik”

“Danbaka esperientzia aberasgarri bezain ezberdina izan da guretzat. Eta ezberdina, diogu, zentzurik onenean. Bizi garen inguru honetan ez da batere normala lehiaketa batean parte hartu ahal izatea; eta azken edizioan beste talde batzuetako partaideekin komentatu izan genuen ez genuela lehiaketa moduan bizi. Esperientzia berri bat bezala bizi izan genuen, talde berriak eta beste plaza bat ezagutzeko aukera gisa. Eta horri gehitzen badiozu zuzeneko kontzertu bat bideoan ederto grabatuta eramateko aukera izaten dutela talde guztiek, ezin daiteke askoz gehiagorik eskatu.

Gainera, Danbakaren bidez Goienak erakutsi du bailarako musika-zaleak batzeko gaitasuna duela. Elkargune bat sortu zuen 2022ko Danbakak puntu zehatz batean bailara osoko musika-zaleak elkartzeko, euskaraz, eta musikaren bueltan. Aspaldi ikusi gabeko jendea elkartu, talde berriak ezagutu… Horrez gain, musika taldeendako erakusleiho ederra ere bada Danbaka”.