Archive for the
‘Albistea’ Category

Irailaren 18an amaitu zen Danbaka musika lehiaketaren bosgarren ediziorako izen-emate epea. 30 taldek eta bakarlarik eman dute izena, eta edizio berri honek ere bermatuko ditu askotarikoak diren estiloak. Izen-ematearen fasea amaitu berri da, beraz, eta orain epaimahaia buru-belarri jarriko da lehiaketan parte hartuko duten hemeretzi taldeak aukeratzeko lanetan. Hogeigarren proposamena publikoak aukeratuko du, Danbaka.eus webgunean.

Hamabi urteko etenaren ostean indarberrituta dator Danbaka musika lehiaketa. Irailaren 18ra egon da zabalik izen-emate epea eta 30 taldek eta bakarlarik eman dute izena. Askotariko proposamenak daude: punka, rock&rolla, metala, pop-rocka, elektronika, ska, rapa, trapa… Uzta berriak itxura ederra dauka… eta Bergarako Seminarixoa aretoa izango da horren lekuko!

Urriaren 14an izango da lehen emanaldia, baina aurretik parte hartuko duten taldeak eta bakarlariak aukeratu behar dira. Irailaren 30ean jakinaraziko da Goienako hedabideetan eta Danbaka.eus-en epaimahaiak aukeratu dituen 19 proposamenak. Hala, irailaren 30etik urriaren 5era bitartean publikoak Danbaka.eus webgunean aukeratuko du 20. proposamena, boto bidez. Hortaz, urriaren 6rako jakinekoa izango da Danbakaren bosgarren edizioko protagonista guztiak zeintzuk izango diren.

Kontzertuak urritik abendura bitarteko bost ostiraletan izango dira, Bergarako Seminarixoa aretoan, 21:30ean hasita. Honako data hauetan izango dira kontzertuak: urriak 14, urriak 28, azaroak 11, azaroak 25 eta abenduak 16. Kontzertu bakoitzean lau taldek hartuko dute parte. Finala 2023ko urtarrilaren 13an izango da.

Bueltan dator Danbaka, indarberrituta bueltatu ere!

Zer dela-eta Danbaka berriro?

Bagenbiltzan azkeneko urteotan Danbaka berreskuratu guran. 2000ko hamarkadan egin ziren lau edizioetan oso ondo funtzionatu zuen eta oroitzapen oso onak geneuzkan. Esango nuke musikarien eta musikazaleen artean ere halaxe dela; baita Goienaren ikus-entzuleen eta irakurleen artean ere.

Ze helburu ditu Danbakak?

Nagusiki, musikariak, bakarlariak eta taldeak haizatzea, haien adierazpen artistikoari lekua eskaintzea eta oihartzuna ematea. Bestetik, bereziki gazteak, baina baita ez horren gazteak direnak, euskarazko hedabideetara gerturatzea. Eta, azkenik, hau guztia, elkarlanean, komunitatearekin batera egitea.

Oraingoan, Bergarako Udalaren laguntzarekin.

Bai. Aurreko Danbakako lau edizioak Elgetan egin genituen, Espaloia Kafe Antzokian. Orduan ere elkarlanean, Elgetako Goienako Kultur Elkartearekin. Luxua izan zen hura. Oraingoan, Bergarako Udalaren laguntzarekin egingo dugu. Azpimarratu nahi dut Bergarako Udalak erraztasun guztiak jarri dizkigula Seminarixoko baliabideak eskura utziz.

Izan ere, Bergarako Seminarixoa aretoan antolatuko dituzue zuzeneko emanaldiak, ezta?

Bai, hala da, eta bertako teknikarien lantaldearen laguntza izango dugu. Alde horretatik, oso pozik gaude. Berme osoarekin egingo direlako kontzertuak. Bergaran egitearen arrazoietako bat izan da Seminarixoa. Danbaka moduko lehiaketa bat antolatzeko agertoki ezin hobea da. Baldintza guztiak eskaintzen ditu. Harmailak erretiratuko ditugu kontzertu egunetan.

Tabernarik ez da izango, ordea…

Bueno, bagabiltza horri soluzioren bat aurkitzeko lanean. Kontzertu egunetan jarri eta kentzeko taberna txiki bat jartzeko aukerak aztertzen… Bestetik, nahiko genuke kanpoko aldean, San Martin plazan, Errege Seminarioaren eraikinaren arkupeetatik gertu, gune bat sortu, taldeen emanalditik emanaldirako tarteetan jendeak izan dezan non hartu trago bat lagun artean, disko-jartzaileekin, chill out estiloko gune bat…

Aurreko edizioetako eskemak erabiliko dituzue?

Bai, Danbaka, funtsean, aurreko edizioen oso antzekoa izango da, gaur egungo errealitatera ekarrita. Nahiko genituzke launa taldeko bost kontzertu antolatu; hortaz, hogei taldek hartuko lukete parte lehiaketan. Eta, horren ostean, beste kontzertu bat, finala, hiru talde onenekin eta talde gonbidatu batekin.

Noiz izango dira kontzertuak?

Urrian hasi eta Gabonak bitartean, bost ostiraletan: urriak 14, urriak 28, azaroak 11, azaroak 25 eta abenduak 16. Finala, ostera, urtarrilaren 13an.

Izen-ematea zabalik da dagoeneko?

Bai. Irailaren 18ra arte eman daiteke izena www.danbaka.eus webgunean. Izen-matea doan da. Baldintza bakarra da Debagoienean erroldatuta egotea parte hartzailea –bakarlaria bada– edo kideetako bat, gutxienez –taldea bada–. Oinarri guztiak webgunean bertan daude. Aurkezten diren taldeen artetik 19 aukeratuko ditu epai-mahaiak eta azkena publikoak. Irail amaieran irekiko dugu www.danbaka.eus webgunearen bitartez, azken talde hori aukeratzeko bidea.

Aurreko Danbaka lehiaketan parte hartu zuten taldeek ere har dezakete parte bosgarren edizio honetan?

Bai, bai, alde horretatik ez dago mugarik. Horrez gain, berdin du aurrez diskoa grabatuta izan edo ez.

Kontzertu guztiak osorik grabatuko dituzue?

Bai. 30 minutuko kontzertua prestatu beharko dute parte hartzaileek. Eta osorik jasoko ditugu, ostean Goiena telebistan eta Goiena.eus-en emateko. Bestalde, kontzertuen kronikak eta aurrekoak argitaratuko ditugu Goienako hedabideetan eta saio bereziak ere sortuko ditugu lehiaketari oihartzun ahalik eta handiena emateko. Uste dut publikoarendako ez ezik, taldeendako ere ona dela Danbaka, zuzeneko kontzertuak kalitatezko baldintzetan emateko aukera sortzeaz gain, edukia haizatu eta taldea ezagutzera emateko plataforma bikaina ere badelako.

Ze sari jasoko du talde irabazleak?

Bi sari banatuko dira. Sari Nagusia: disko bat estudioan grabatzea; Publikoaren Saria: bideoklipa.

Bosgarren aldia izango da oraingoa. Bergarako Seminarixoa aretoan egingo da. Bost kontzertu izango dira, urritik abendura, eta finala, urtarrilean. Debagoieneko musika taldeek hartu ahal izango dute parte. Izen ematea zabalik da. Goiena Komunikazio Taldeak antolatuko du, Bergarako Udalaren laguntzarekin.

 

Gaur aurkeztu da Danbaka Debagoieneko Musika Lehiaketa, Bergarako Seminarixoa aretoan. 12 urteko etenaren ostean, berriro antolatuko dute. Bergarako Udala izango du bidelagun Goiena Komunikazio Taldeak.

 

20 talde

Debagoieneko hogei taldek hartu ahalko dute parte lehiaketan. Hemeretzi talde Danbakako epaimahaiak aukeratuko ditu; azkena, publikoak, haien botoen bidez. Zuzeneko emanaldietan erakutsi beharko dituzte musikariek dohainak. Hala, bost kontzertu antolatuko dira, urriaren 14tik abenduaren 16ra, ostiralez, 22:00etan hasita, Bergarako Seminarixoan. Edozein eratako musika estiloak onartuko dira. Sari nagusia izango da diskoa grabatzea. Publikoaren Saria ere egongo da: abesti baten bideoklipa.

Izen ematea zabalik dago. Irailaren 18ra arte eman ahalko dute izena Debagoieneko musikariek. Edozein estilotako bakarlariak eta taldeak onartuko dira. Baldintza izango da parte-hartzaileetako bat –gutxienez– Debagoienean erroldatuta egotea.

Izena emateko modua izango da www.danbaka.eus webgunearen bitartez. 

 

 

 

 

 

 

 

 

 

 

 

 

 

 

Bosgarren edizioa

Bergarako Seminarixoa aretoan aurkeztu dute lehiaketa. Kristina Markina eta Ekaitz Aranberri Bergarako Udal Gobernuko zinegotziak eta Monika Belastegi eta Jokin Bereziartua Goiena Komunikazio Taldeko ordezkariak izan dira bertan. 

Lehiaketa berriro antolatzeko arrazoiak azaldu dituzte, lehenbizi; ostean, helburuak, oinarriak, sariak, parte hartzeko moduak, kontzertuak… 

 

Bost kontzertu: urritik abendura

Bost kontzertu antolatuko dira lehiaketan zehar eta talde edo bakarlari bakoitzak 30 minutuko saioa egin beharko du zuzenean, Seminarixoko agertokian. Honako hauek izango dira kontzertu egunak: urriak 14, urriak 28, azaroak 11, azaroak 25 eta abenduak 16. Bost kontzertu horietatik hiru onenak aukeratuko ditu epaimahaiak eta finala jokatuko dute 2023ko urtarrilaren 13an. Kontzertuak 22:00etan hasiko dira. Sarrerak 5 eurotan salduko dira –Goienakide direnendako, 3 euro–.

Bi sari banatuko dira. Lehen Saria: disko bat grabatzea. Publikoaren Saria: Bideoklipa. 

 

Jarraipen zabala

Goiena Komunikazio Taldeak jarraipen uneoroko eta zabala egingo dio Danbaka Musika Lehiaketari. Euskarri guztietan: Goiena.eus, Goiena telebista, Goiena aldizkaria, Puntua aldizkaria eta Arrasate Irratia. Baita sare sozialen bidez ere. Kontzertu guztiak, oso-osorik, grabatuko dira eta ostean emango dira Goiena telebistan eta Goiena.eus-en. Era berean, lehiaketak kontu propioa izango du Instagramen: danbaka. Baita webgunea ere: www.danbaka.eus

 

Izen ematea

www.danbaka.eus webgunean egongo da lehiaketari buruzko informazio osoa. Hain justu ere, izen ematea webgunearen bidez egin beharko da. Izena ematerakoan, parte-hartzaileek honako hau eman beharko dute: taldearen edo bakarlariaren izena eta informazioa –noiz sortutakoa den, kideen izen-abizenak, estiloa, ibilbidea…–, eta hiru abestiren audio digitala, horietako bat originala izan beharko da. Parte-hartzea doakoa izango da. 

Behin lehiaketan parte hartuko duten hogei taldeak aukeratuta, egutegia zehaztuko dute eta parte hartzaile bakoitzak 30 minutuko emanaldia egingo du zuzenean. Gutxienez, bi abestik euskaraz izan beharko dute. Eta epaimahaiak baloratu egingo du euskaraz abestea. 

Seminarixoa aretoa izango da kontzertuen tokia. Horretarako, harmailak kendu egingo dituzte. Bestalde, areto kanpoaldean gune berezia sortuko da, jan-edatekoekin eta musikarekin –DJak izango dira–, emanalditik emanaldirako atsedenaldiak girotzeko.